BINTI WA MIAKA 16 YUPO HOI HOSPITALINI AKIUGUZA MAJERAHA KICHWANI BAADA YA KUNG'ATWA NA MWAJIRI WAKE

Vitendo vya unyanyasaji wa mabinti wa kazi majumbani vimeendelea kuripotiwa jijini Dar es Salaam baada ya binti mwingine Melina Mathayo mwenye umri wa miaka 16 kukatwa katwa sehemu ya kichwa na kung'atwa ikiwa ni adhabu aliyokuwa akipewa kwa zaidi ya miaka miwili na mwajiri wake Yasinta Chengula huko Boko. 

ITV imemtembelea binti huyo mzaliwa wa Bukoba katika hospitali ya Mwananyamala alikokimbizwa kwa matababu ambapo afisa wa kitengo cha ustawi wa jamii Bi Rozi Ally amesema binti huyo amefanyiwa ukatili kitendo kilichomsababishia majeraha ya sehemu mabalimbali za mwili wake hasa kichwani na mara baada ya kupewa matibabu waligundua kuna uwezekano wa kuwa na damu kuendelea kuvuja ndani kwa ndani na kulazimika kuhamishiwa katika  hospitali ya taifa Muhimbili.

ITV ikazuru katika taasisi ya kutibu mifupa MOI ambapo binti Melina amelawa kwa matibabu na kufanya mahojiano na binti huyo ambapo akiongea kwa tabu ameweza kufafanua mateso aliyokuwa anayapata kwa kipindi chote hicho alichokuwa anakaa na mwajiri wake Bi. Yasinta Chengula ambaye ni mwanasheria na kuwa aliyemwokoa ni dada wa mwajiri wake bada ya kumkuta katika hali mbaya.

Afisa uhusiano MOI Bw. Patrick Mvungi amesema binti huyo alipokelewa hospitalini hapo saa saba usiku 13 June mwaka huu akiwa katika hali mbaya na kuwa kwa sasa wanasubiri majibu ya kipimo cha kichwa alichofanyiwa ili kubaini kama kutakuwa na tatizo ndani ya kichwa chake kutokana na hali yake kutoridhisha baada ya kushonwa alikokatwa.

 Kamanda wa polisi mkoa wa Kipolisi Kinondoni Camillius Wambura amedhibitisha kutokea kwa tukio hilo na mtuhumiwa ametoroka mara baada ya binti huyo kufikishwa hospitalini na bado jeshi hilo linaendelea kumtafuta.